شاعیر: عەبدوڵڵا پەشێو
کتێب: دیوانی برووسکەچاندن
سەرناو: حەسرەت
لەبارەی شیعر: (١٩٨٢/٤/٢٥ - مۆسکۆ) - نووسین: ناشناس - سەرچاوە: https: //t. me/abdulla_pashew

سەد مخابن! 
ئەو ئازیزانەی ڕۆژگارێک
بژوێنی [١] حەسانەوەم بوون، 
ئەوانەی شەکرەمێوانی
دڵی هەردەم کراوەم بوون، 

هەنووکانە
یا نەماون لە یادمدا، 
یا ماوێکی کاڵ و ماتن. 
کەچی... ئێستاش
هەر چاوەڕێی ئەو ئاسکانەم
کە بەڵێنیان دا و نەهاتن! 

١. بژوێن: مێرگ، سەوزەڵان